भक्तपुर, असोज ७ । हिमालयन ग्लोरी स्काउट ट्रुपको आयोजनामा सात दिने छात्रा स्काउट साइकल प्रशिक्षण कार्यक्रम आज सम्पन्न भएको छ । नियो फ्युजन ओपन रोभर रेन्जर क्रूको प्राविधिक सहयोगमा सम्पन्न सो तालिममा ३६ जना ३६ स्काउटसदस्यहरूले सहभागिता जनाएका थिए ।
कार्यक्रमको समापन ४५ औं नेपाल भाषा साहित्य तःमूज्या ग्वसाखलका अध्यक्ष रवीन्द्र खर्बुजाको प्रमुख आतिथ्यमा सम्पन्न भयो । उहाँले साहित्य र कलाको माध्यमले समाजमा सचेतना फैलाउने विषयमा जोड दिँदै स्काउटले देशप्रतिको भक्ति र समाजसेवाको भावना विकास गर्न महत्त्वपूर्ण भूमिका खेलेको बताउनुभयो ।
उक्त समारोहमा विशेष अतिथि भक्तपुर नगरपालिकास्थानिय स्काउट परिषद्का प्रमुख आयुक्त बालकृष्ण बनमालाले स्काउट शिक्षालाई बालबालिकाहरूलाई व्यावहारिक जीवनकला सिकाउने ’अमृत’ को रूपमा वर्णन गर्नुभयो । उहाँले स्काउट शिक्षाले युवाहरूलाई अनुशासन, एकताका साथै कठिन परिस्थितिमा पनि अगाडि बढ्न सिकाउने कुरा उल्लेख गर्नुभयो ।
कार्यक्रमका संयोजक न्हुज किजुले महिला साइकल सवारीको महत्त्व दर्शाउँदै किशोरीहरूलाई साइकल सिकाउने यो पहल शुरु गरिएको बताउनुभयो । उहाँले सुरुमा यो चुनौतिपूर्ण भए तापनि सहभागीहरूको उत्साहले यसलाई अन्य स्कूलहरूमा पनि विस्तार गर्न प्रेरित गरेको जानकारी दिनुभयो ।
कार्यक्रमका सभापति तथा हिमालयन ग्लोरी इङ्लिश स्कूलका प्रधानाध्यापक कृष्णराम त्वानाबासूले आफ्नो विद्यालयमा १५ वर्षदेखि स्काउट गतिविधिहरू सफलतापूर्वक संचालन भइरहेको र यसले विद्यार्थीहरूको शैक्षिक र व्यक्तित्व विकासमा ठूलो योगदान पुर्याएको प्रसन्नता व्यक्त गर्नुभयो ।
स्थानीय स्काउट परिषद्का सामुदायिक विकास आयुक्त एवं विद्यालयका स्काउट मास्टर पुष्पा प्रजापतिले स्वागत दिनुभएको उक्त कार्यक्रममा रोभर बिमल बाहाल, स्काउट छात्रा सुभेक्छा पक्का र श्रेश्ना सैंजूले पनि बोल्नुभएको थियो ।
