भक्तपुर । २०८१ भदौ २५, मंगलबार ||

संस्थागत विद्यालय संघ नेपाल (इसान) भक्तपुर जिल्ला समितिको आयोजनामा व्ठ फुटसल च्याम्पियनशीप आजबाट शुरु भएको छ । राष्ट्रिय बाल दिवसको अवसरमा भदौ २५, २६ र २७ गते सम्म सञ्चालन हुने जुनियर फुटसल प्रतियोगिताको आज उद्घाटन गर्दै कार्यक्रमका प्रमुख अतिथि भक्तपुर नगरपालिकाका प्रमुख सुनिल प्रजापतिले विद्यार्थी जीवनमा गरेको मेहेनतले विद्यार्थीको भविष्य उज्ज्वल बनाउने धारणा राख्नुभयो । कार्यक्रममा प्रमुख प्रजापतिले खेलका माध्यमबाट खेलाडीहरुले राष्ट्रिय अन्तर्राष्ट्रिय रुपमा उत्कृष्ट खेल प्रदर्शन गरी देशको गरिमालाई उँचो बनाएको बताउनुभयो ।

प्रमुख प्रजापतिले कुनै पनि काम सानो ठूलो नहुने बताउँदै श्रमलाई माया गर्नुपर्छ भन्नुभयो । कठिन मेहनत र परिश्रमले विद्यार्थीलाई सफल बनाउने बताउँदै उहाँले खेलकुद गतिविधिलाई निरन्तरता दिन सके शारीरिक र मानसिक रुपले स्वस्थ र तन्दुरुस्त रहन मद्दत पुग्ने बताउनुभयो । भक्तपुर नगरपालिकाले खेलकुद प्रतियोगितालाई चालु राखेको बताउँदै सरकारको भर नपरी भक्तपुर नपाले आफ्नै स्रोत साधनले खेलकुद क्षेत्रको विकासमा विशेष पहल गर्दै आइरहेको बताउनुभयो ।

इसानका केन्द्रीय अध्यक्ष प्रेमजन थापाले विद्यार्थीहरुको बौद्धिक र मानसिक विकास सँगसँगै शारीरिक विकासको लागि पनि खेलकुदले महत्वपूणर् भूमिका खेल्ने बताउँदै इसानले विद्यार्थीहरुको समग्र विकासको लागि अतिरिक्त क्रियाकलापलाई  जोड दिँदै आएको बताउनुभयो ।

इसान जिल्ला समितिका अध्यक्ष कृष्णराम त्वानाबासुले इसान आबद्ध विद्यालयका विद्यार्थीहरुको अन्तरनिहित प्रतिभा प्रस्फुटन गर्न प्रतियोगिता आयोजना गरेको बताउँदै विद्यार्थीहरुले जित्ने वा सिक्ने भावनाले खेलकुद प्रतियोगितामा भाग लिन प्रेरित गर्नुभयो ।

सूर्यदिप इ. स्कूलका प्रधानाध्यापक लक्ष्मीप्रसाद प्रजापतिले स्वागत मन्तव्य दिनुभएको उक्त कार्यक्रममा विद्यालयका शिक्षक मोहन भुजेलले पनि बोल्नुभएको थियो भने प्रमुख प्रजापतिले प्रतियोगिता सफलतापूर्वक सम्पन्न गर्न शुभकामना दिँदै रेफ्रिलाई बल हस्तान्तरण गर्नुभएको थियो ।