भक्तपुर नगरपालिकाका प्रमुख सुनिल प्रजापतिले शिक्षाको गुणात्मक विकास नै समृद्ध समाजको वास्तविक मेरुदण्ड भएको बताउनुभएको छ । हिमालयन ग्लोरी इङ्गलिश स्कूलको आयोजनामा सम्पन्न भव्य अभिभावक दिवस, विद्यार्थी—शिक्षक सम्मान तथा सांस्कृतिक कार्यक्रमलाई सम्बोधन गर्दै उहाँले विद्यालयको उत्कृष्ट भौतिक पूर्वाधार, अनुभवी एवं समर्पित शिक्षक, अनुशासित विद्यार्थी र विद्यालयलाई सदैव साथ दिने सचेत अभिभावकको सामूहिक प्रयासबाट मात्रै शैक्षिक लक्ष्य प्राप्ति हुनेमा जोड दिनुभयो । भक्तपुरका अग्रजहरूको ऐतिहासिक योगदानलाई स्मरण गर्दै उहाँले नयाँ पुस्तामा पठन संस्कृतिको विकास गर्न नगरपालिकाले स्तरीय जनज्योति पुस्तकालय सञ्चालनमा ल्याएको जानकारी गराउनुभयो । उहाँले ‘समान शिक्षा र समान व्यवहार’ आजको समयको अपरिहार्य आवश्यकता भएको उल्लेख गर्दै नयाँ पुस्तालाई स्वस्थ प्रतिस्पर्धाको भावनाका साथ देश निर्माणको महाअभियानमा सहभागी गराउनुपर्ने धारणा राख्नुभयो ।
प्रमुख प्रजापतिले भक्तपुरका सामुदायिक र निजी विद्यालयहरू बीच गुणस्तरीय शिक्षाका लागि भइरहेको प्रतिस्पर्धालाई सकारात्मक रूपमा लिँदै शैक्षिक क्षेत्रमा हुने बन्द र हड्तालले विद्यार्थीको भविष्यमा गम्भीर असर पु¥याउने बताउनुभयो । उहाँले यस्ता अवरोधहरूलाई बुद्धिमा बिर्को लगाउनु’ सँग तुलना गर्दै विद्यालयहरूलाई सधैं निर्बाध रूपमा सञ्चालन गरिनुपर्नेमा जोड दिनुभयो । सोही अवसरमा विद्यालयका प्रिन्सिपल कृष्णराम त्वानाबासुले विद्यालयले सधैं नैतिकता, अनुशासन र समयसापेक्ष सीपयुक्त दक्ष जनशक्ति उत्पादनमा केन्द्रित रहेर शिक्षा प्रदान गरिरहेको स्पष्ट पार्नुभयो । कार्यक्रममा विद्यालय व्यवस्थापन समितिका सदस्य रविन्द्र खर्बुजाले भक्तपुरको शैक्षिक लगानीको प्रतिफल अहिले समाज विकासमा देखिन थालेको र नगरपालिकाद्वारा सञ्चालित कलेजहरूले देशभरकै विद्यार्थीलाई सुलभ शुल्कमा गुणस्तरीय शिक्षा प्रदान गरेर एउटा नमूना पेश गरेको बताउनुभयो । उहाँले पुँजीवादी व्यवस्थाको विकल्पमा समाजवादी व्यवस्थाले मात्रै आम जनताका आधारभूत समस्याको वास्तविक समाधान दिने तर्क समेत गर्नुभयो ।
कार्यक्रममा इसानका केन्द्रीय अध्यक्ष प्रेमजन थापाले विद्यार्थी, शिक्षक र अभिभावक तीनै पक्षमा अध्ययनको रुचि हुनुपर्ने र यसले पेशागत तथा व्यवहारिक जीवनमा सकारात्मक ऊर्जा थप्ने उल्लेख गर्नुभयो । विद्यालय व्यवस्थापन समितिका अध्यक्ष आशराम वैद्यको सभापतित्वमा सम्पन्न उक्त विशेष समारोहमा प्रमुख अतिथि प्रजापतिले एसईई उत्तीर्ण विद्यार्थीहरू र विद्यालयमा लामो समयदेखि अटुट सेवा पु¥याउँदै आएका समर्पित शिक्षक तथा कर्मचारीहरूलाई मायाको चिनो र प्रशंसापत्र प्रदान गर्नुभएको थियो । यसैगरी शैक्षिक सत्र २०८१ मा नर्सरीदेखि कक्षा १० सम्मका उत्कृष्ट नतिजा हासिल गर्ने जेहेन्दार विद्यार्थीहरूलाई पनि पुरस्कार वितरण गरिएको थियो । औपचारिक सत्रको समाप्ति पश्चात् प्लेग्रुपदेखि कक्षा १० सम्मका विद्यार्थीहरूले विभिन्न २४ वटा आकर्षक सांस्कृतिक प्रस्तुतिहरू मार्फत आफ्नो प्रतिभा प्रदर्शन गरेका थिए, जसले उपस्थित अभिभावक र पाहुनाहरूलाई मन्त्रमुग्ध पारेको थियो ।
