भक्तपुर । हिमालयन ग्लोरी इङ्गलिश स्कूलबाट एसईई परीक्षा २०८१ मा सफल विद्यार्थीहरुलाई बधाई ज्ञापन तथा मार्गनिर्देशन कार्यक्रम आज सम्पन्न भयो ।
कार्यक्रमका प्रमुख अतिथि साविक भ.न.पा. वडा नं. १५ का पूर्व वडा अध्यक्ष एवं विद्यालय व्यवस्थापन समितिका सदस्य श्री रवीन्द्र खर्बुजाले उच्च शिक्षाको विषय छनौट आफ्नो क्षमता, चाहना र अभिभावकको भावनाअनुसार गर्नुपर्ने सुझाव दिनुभयो । विद्यालय छनौट गर्दा आफ्नो आर्थिक स्थिति, पढाइको सहज वातावरणलाई समेत ख्याल गर्नुपर्ने उल्लेख गर्दै अतिथि खर्बुजाले भक्तपुरका शैक्षिक संस्थाहरु एदाहरणीय शैक्षिक केन्द्रका रुपमा परिचित हुँदै आएको जानकारी दिनुभयो । वहाँले भक्तपुरकै शैक्षिक संस्थाहरुमा अध्ययन गर्दा राम्रो हुने बताउनुभयो ।
कार्यक्रमका अर्का अतिथि भनपा वडा नं. २ का वडा सदस्य श्यामसुन्दर मातांले विद्यार्थीहरुले जुनसुकै विषय लिएर अध्ययन गरे पनि विशेषज्ञता हासिल गरी देश र जनताको इमानदारीपूर्वक सेवा गर्ने सोचका साथ अध्ययन गर्न सुझाव दिनुभयो ।
विद्यालयका प्रिन्सिपल श्री कृष्ण राम त्वानाबासूको सभापतित्वमा सम्पन्न उक्त कार्यक्रममा सभापति त्वानाबासूले विद्यालयको एसईई नतिजाबारे जानकारी गराउँदै उत्कृष्ट नतिजाका लागि सम्पूर्ण विद्यार्थीहरुमा बधाई दिनुभयो । साथै विद्यार्थीहरुको उत्कृष्ट नतिजा ल्याउन हरक्षण मेहनत गर्नुहुने सम्पूर्ण शिक्षकहरु तथा साथ दिनुभएकोमा अभिभावकहरुलाई समेत धन्यवाद दिनुभयो ।
हाल कक्षा १० अध्ययनरत विद्यार्थीहरुको उपस्थितिमा भएको उक्त कार्यक्रममा कक्षा १० की छात्रा इभाञ्जली बोयजूले यो वर्षको नतिजाबाट अर्को वर्ष हाम्रो नतिजा एवं अध्ययनका लागि हौसला मिलेको बताउनुहँदै अर्को साल अझ राम्रो नतिजा ल्याउन प्रयास गर्ने बताउनुभयो ।
उक्त कार्यक्रममा एसईई परीक्षामा सफल विद्यार्थीहरु दीपा मगर, प्रशमन बाटी, लबिन प्रधान, सौरभ मानन्धर, कृषा मचामसी लगायतले आ–आफ्नो अनुभव सुनाउनु भएको थियो ।
